Darréu (c)

Dende estes agrupaciones llocales, denunciamos l’intentu d’utilizar a Darréu p’afondar na inestabilidá interna qu’anguaño esiste n’Andecha Astur. Esiste l’interés en facer a Darréu complice de les actidudes golpistes d’una minoría de la militancia d’Andecha Astur, dalgo, pa nosotros, inaceutable cuando la mayoría de la militancia de la nuesa organización nun ye militante de la mesma y tien un total desconocimientu del fondu de lo que ta pasando.

Darréu entra dientro de la estratexa golpista d’una parte minoritaria de la militancia d’Andecha Astur, y p’afitar esti fechu, alcontrámonos con intentos d’espulsión a dellos militantes por motivos de cuotes, cosa qu’enantes nunca pasara y cuando dende siempres l’ayalguería de la nuesa organización carauterizóse pol so descontrol encuantes a esti asuntu, amás de que dichos militantes nun recibieron nengún apercibimientu personal de que nun teníen les cuotes al día. Esta nun ye más qu’una ocurrencia oportunista pa quitase del mediu a dellos militantes. Per otru llau, como otru intentu d’apartar a otra parte de la militancia de Darréu que ye “hostil” a los intereses “golpistes”, alcontrámonos con una supuesta espulsión a otros militantes pol simple fechu d’asistir a les Xuntes Nacionales llexítimes d’Andecha Astur, nuna actitú facista de “o tas conmigo, o tas contra mi”, espulsiones, hai que dicir, acordaes nuna Xunta Nacional de Darréu cellebrada’l pasáu 13 de xineru, fecha na que dalgunes agrupaciones llocales “molestes” teníemos actos convocaos y nun podíemos asistir.

Dende estes tres agrupaciones llocales de Darréu, llamentamos los enfotos de dalgunos militantes de la nuesa organización, que tamién lo son d’Andecha Astur y tán vinculaos al sector golpista, de francer esta organización de mocedá pa servir intereses ayenos a ella. Entendemos que la función d’una organización de mocedá, como la que yera Darréu hasta va pocos meses, ye la d’atropar y organizar a la mocedá asturiana interesada en crear una alternativa socialista y nacionaliega pa les moces y mozos del nuesu país. Anguaño, alcontrámonos con intereses que son contrarios a esti oxetivu, y que nun fairán que destruyir pasín ente pasu a esta organización